15th January, 2015
Edit

$500同學仔搭巴士事件:識得撳,梗係撳$400

關於$500同學仔搭巴士事件,我覺得最應該要檢討嘅唔係:點解佢闊佬入$500落去,佢對金錢有無概念?

即係,你都可能會遇過好緊急嘅時候,同的士大佬講:唔駛找!然後急急腳落車走人。

其實$500同學都係咁嘅慌張心理,只不過呢架唔係的士,而係巴士。

人急亂起來,有咩做唔出?俗語都有句:屎急馬行田。

道理一早好明顯,同金錢概念無關,而係同應變力有關!

同學仔都未經過大考驗,邊度來應變力?今次$500搭巴士,可能就係佢生存到呢一刻為止最大嘅應變考驗!你想佢點?

我唔理佢係咪含金鎖匙出世定係草根赤貧,如果佢係為免遲到而忍痛入$500,我覺得佢咁做代表咗佢認為守時比金錢重要!如果真係咁,我俾個讚佢都來唔切,而唔會話佢無金錢概念。

一個人可以將時間看得比金錢重要,係連「陀飛輪」嘅人都未必會去思考嘅問題,而今日同學仔唔經思考,就用行動證明佢係個看重時間嘅人,極唔容易!

不妨又問下自己,在遲到同唔遲到之間,你容許自己犧牲幾多金錢?

講咁耐,其實上面嘅都唔係重點,講返要檢討嘅就係:點解佢父母唔將$500打散咗先俾佢?$500唔係咁易唱得散!我相信唔少人去ATM都會好多時撳$400,而唔係撳$500。或者,點解同學去ATM撳$500而唔撳$400?總之去撳錢,梗係點都要撳返一兩張大一百蚊紙。如果佢哋識得撳,今日只需蝕九十幾,而唔係四舊幾。

希望佢哋這一家會汲取今次教訓:識得撳,梗係撳$400/$800!

PS. 牛太託語:唔小心撳咗$500,俾小魚教訓梗,要遲尐見大家。


Comments