23rd March, 2014
Edit

「肥妹加油!」-觀塘物華街臨時小販市場僅存的檔口

李小姐十多歲時最重有190磅,縱使現在體重已回落,這稱呼已不相稱,但看著她成長的街坊仍稱呼她「肥妹」。她是觀塘物華街臨時小販市場唯一仍在做生意的檔口-「肥妹內衣」的檔主。

肥妹自8歲起跟媽媽做無牌小販,小學畢業後有自己的木頭車賣內衣,八、九十年代加入物華街臨時小販市場,不用再走鬼。一世人只做小販,做了四十多年。

二月時,市建局沒有履行「無縫交接」,新街市未起好就要小販遷出市集,等待新街市搞掂才搬進去做生意(但未知幾時起好)。二月四日前遷出的檔戶,可獲九萬六千元特惠津貼,經營至二十八日的話,補償額將減至六萬四千元,逾期將無任何補償。一百一十二個小販攤檔中,只有肥妹內衣堅持「無縫交接」-攞番個承諾,沒接受補償錢。

肥妹說:「雖然無咗錢,成十萬蚊,要賺好多個月,真係好多,但啲錢要唔落。」
「留喺度生意唔多,但買到人情,有顧客打氣支持,個心賺咗,錢買唔到。」
「想比後生仔知,唔係有錢大晒,錢真係好,但唔係樣樣以錢行頭。」

物華街臨時小販市場現在圍了板,但圍板上有Tape Art,圍板內有社區圖片故事展(還有關於觀塘區重建的剪報),值得去看看,還有跟肥妹說聲:「加油!」


Comments