Latest
Hot Post

容易受傷的女人

絕對唔誇張 減肥中嘅嘅女仔就係咁脆弱 無論係一塊薯片定一粒朱古力還是一啖雪榚 都可以將佢地徹底擊敗 減肥中嘅女仔就係失去理性唔識計數 絕對會因為一塊得嗰十幾卡路里嘅薯片 而自暴自棄去鯨吞一包總值幾百甚至幾千卡路里嘅勁量裝薯片 之後再無限悔咎無限自責 最終減肥變增肥再暴肥 呢個時候你咩都唔使講 因為呢家野唔係當事人係唔會明嘅 當你以為食多左嗰少少好小事姐 但係你唔會知道對於佢黎講係幾大件事係幾咁重要 個種不安就好比和尚食左肉戒毒吸返毒一樣 係一種旁人無法體會嘅愧疚 亦都因為係咁少少嘅少事 令到自己更加會罵自己點解可以咁無用連咁少少嘅少事都做唔到 呢家野要嘅就係你鐵一般嘅意志 只能說減肥係一場持久戰 有人會一敗不起一蹶不振有人會重新振作再接再厲 只要屢敗屢戰再敗再戰 終有一日你會戰無不勝 如果容易受傷的女人 可以變做容易瘦身的女人你話幾好呢 姐妹們 共勉之。

下次下次下次真係大概可以?

  「食埋今次下次唔食」 「玩埋今次下次唔玩」 「下次一定會努力」 「下次一定俾心機」 「下次一定到」 「下次請食飯」 「下次叫埋你」 「下次先算啦」   問題一: 點解我地成日講下次? 其實真係唔怪得我地 只因【下次】呢兩個字實在太順口太實用 講左下次 咁今次就可以由得佢 講左下次 係咪真都唔使負責任 撞到識識地但又唔係好熟嘅講句「下次飲茶」 下次都唔知下次仲撞唔撞到,就算撞到都下之都唔會真係去左飲茶 因為大家都心知呢句下次唔係真係講緊下次 講左下次如果真係唔得咁咪再講下次 講完下下次如果都係做唔到都唔緊要 再講多次下次又係一條好漢 今次(____) 完講下次唔再(____) 下次(____)完再講下下次唔會再(____) (可自行填充適用字詞) 講幾多次下次都絕對無問題 講到下下下下下下下下下下下下下下下下下下下下下下下下下下下下次之後 都仲可以講多幾次下次下次都無人阻到你   下次下次下次真係大概可以? 呢個係一個謎。 問題二: 全文共出現幾多次下次呢? (答中而被抽中者下次請飲茶)

【地鐵人生之內心獨白】

  地鐵,為我地帶黎方便。 疏導人潮,需要暢通的列車。 但當遇到隨處拋棄的垃圾、超多人群同臭狐(etc), 擠逼嘅列車就會為我地帶黎煩惱。 列車暢通,有你幫手,梗會成功。   【地鐵人生之內心獨白】   唔同人係唔同工作唔同地方都企係唔同嘅位置有唔同嘅諗法 就算搭地鐵等地鐵嘅時候都唔例外   想像宜家係六點鐘係中環地鐵站呢個死亡時間死亡地鐘站等緊死亡列車 當你係逼過書展動漫展嘅月台等左五六班車都未有任何進展 再見到每班同你say byebye嘅列車入面有大量空位 其實可以容納二十個人而唔係五個人嘅時候 你忟過忟薑嘅心情應該忟到不能再忟   但係同一時候, 當你企係逼到不能再逼嘅死亡列車入面 見到洶湧嘅人群步步進逼 好似攻城咁攻入黎以為呢架係末日飛船過咁湧入黎 但係你後面嘅人群堅守佢嘅崗位寸步不離扎曬馬咁半步都唔肯讓 咁你只可以係中間好似夾心餅入面嘅朱古力或者士多啤梨醬咁俾人夾啊夾夾啊夾 直到永遠   ­小故事大道理 呢啲就係所謂人生嘅矛盾 我唔明你你都唔懂我 唯有搶到個靚位視世事如無物至係王道

HK Style 之未返到Office嘅Office Lady (之正常過正常篇)

  大家唔好以為OL真係OL咁簡單 係唔同O做嘅唔同L都有佢唔同嘅STYLE 而唔同L係唔同嘅O又有住唔同嘅形態 我知咁樣O黎O去 L黎L去咁虛無搞到大家好似入左迷莽會一樣咁迷惘 而我卻在網外看始終不釋放 唔打緊兼無有怕! 呢啲粗重野就等我地Plastic Thing做啦! 我地膠的東西會幫大家圖文並茂 重點分析 務求另大家一點就知 一睇就明 簡直明白過師父明白了! 今期就同大家好正常咁介紹正常過正常 / 無得再正常 / 比正常更正常嘅正常OL! (Sorry! 我update嘅程度淨係去到賤人就是矯情 呢期其實有無話興緊邊套?)

Plastic Thing 請大家多多指膠!

  我宜家嘅心情真係既開心又興奮 既快樂又感動 因為我地Plastic Thing 終於都大鄉里出到城黎到呢個 Cosmopolitan 大都市 呢到五光十色令我井底之蛙大開眼界! 真係要大喊一聲I love Hong Kong! 大家黎自大都市可能唔識我地呢啲大鄉里唔緊要! 邊個都可以睇下我啲好嘢嘅! https://www.facebook.com/yanip1012 大家只要好快手咁click一click條link 再好順手咁like一like個page咁就咩都一清二楚啦! 事先聲明 我地呢到係純膠笑走壓力 所以係呢個膠的東西膠的世界裏面大家請先放下你認真且理智嘅腦袋 係呢個世界內係沒有對或錯,亦不存在任何嘲笑成份,只有一對膠眼睛在看香港 除左大喊一聲I love Hong Kong之外 仲要大喊多聲 放鬆下啦香港人! 好啦! 今日同大家膠住咁多心先 最後老老土土都要講一句 請大家多多指膠!