24th November, 2017
Edit

一切從零開始 (純文字)

十一月二十四日…二零零一年十一月二十四日我們走在一起了…

拍拖紀念日…我有事要宣佈…

我們將會再做爸爸媽媽啦…


再度懷孕…心情真係唔識形容…

相隔咁耐再生第二個…好多人會覺得好奇怪…

點解???

只有講…人人計劃唔同…

只能夠講不屬意外…全屬…我們的計劃… 經期一向唔太準…試過相隔46天…

而我又有經期前的不適感…一直不以為意…

到了第50天…發覺好似唔對路…就買左驗孕棒驗一驗…

一條深一條淺…咁就決定去醫生度驗一驗…

順道拎醫生証明…

原來…計計下…醫生話已經七周多…

預產期會係秘密…出世個時你就知…

不過…經期唔準…胎兒實際大小要照一照超聲波…

政府醫院婦產科登記…需要以下資料…

1 ~ 你既身份証正本…

2 ~ 醫生紙証明你有左…

3 ~ 住址証明…証明你既地址所屬你登記既醫院

4 ~ 如果地址唔係你個名…係你老公個名…咁就需要結婚証書同你老公既身份証副本…


瑪嘉烈醫院K座地下接待處…

辦公時間 ~

星期一至五 : 上午九時正至下午五時正…

星期六 : 上午九時正至下午一時正 …

星期日及公眾假期 : 休息…


登記個陣…職員問我有冇安排出面做唐氏綜合症檢查…我話冇…

佢就為我安排一個期在十三週二天做…

另外安排產期檢查在十四週二天見姑娘…

老實說…相隔十三年…

一切真的有點生疏…一切要由頭來過…

以前後生就話百無禁忌…家下就要寧可信其有了…

上網揾禁忌食物…希望胎兒陀得好一點…

女兒有濕疹…好多老一輩話係我未有戒食牛肉所致…

這一胎…我會戒食牛肉…

其實…對於我有難度…

我係愛牛之人呢…

以前後生…真係生冷食物食唔少…

家下年紀大…真係要小心為上…

凍飲唔飲…冷食唔食…

戒食生冷食物…真係好辛苦…

幸好…逃過炎夏…

如果唔係真係唔知點頂…我好怕熱架…

戒食…最慘係係睇到朋友仔 POST 既食物相…真係流哂口水…

不過…我家兩個陪我戒食…辛苦哂…

說好的放題一樣唔去了…等我生左再去喎…

已踏入高齡產婦之年… 身體的確爭好遠…

朝朝起身…一擦牙就想嘔…

就算過得到擦牙一關…又要過飲水一關…

擦左牙想飲啖水…一飲水就想嘔了…

只有呷少少…濕一濕咀…濕一濕喉嚨…

晨早嘔真係嘔到黃膽水都出埋…

食又唔食得…食少少已經覺得好飽…

尤其晚餐…食得少左…

唔好講食…煮既時候已經有點反胃…

睇到已經覺得好飽…真係夾硬食落肚…

對於油膩…濃味既食物…有點卻步…

平日煮開既餸…真係唔係咁想食…

胃口變得好利害…

可是…食得太少…

去到十一二點…胃就咕嚕咕嚕…

只有…繼續餓住咁瞓覺…

人冇重…反而輕了…

只有飲孕婦奶粉補一補…

人又容易累…經常想瞓…

每日要有一個小睡…唔係真係一到煮飯時間就呆哂…

一到十點左右就已經好想好想上床…

一上床就已經呼呼入睡了…

行得快一點就好似呌唔到氣咁…有點喘氣呢…

老公同個女要就我腳步…

追車就真係唔駛講…我情願等下一部…

莫講話跑…真係行快兩步都唔得呢…

好想講…有仔真係要趁嫩生…

記得個陣陀住個女…行動自如…見肚先至有人問我係咪有左…

好食得…唔會好似宜家咁食唔落…

嘔都有…不過…真係唔會好似宜家咁辛苦…


跟住…我想講下我個女…

當我同小女講媽媽準備生BB…

老實說…小女俾我感覺大個左…

小女開始顧及我的感受…

驚我辛苦…幫我做左唔少家務…

斟茶遞水…一樣未有怨言…

小女仲問我BB係男仔定女仔…

我話唔知喎…你想係細佬定細妹呀?

小女話妹妹…

名字為我想了好幾個…雖然…唔順口…

還講到我生左BB之後的一個月…

小女幫我買餸煮飯…雖然…小女只會煮麵…

不過…我真心欣賞小女…

在百忙既學業之外…為我想了很多…

還有…為了唔想我粗心勞氣…

自動自覺咁安排自己既功課同温習時間…雖然有點甩甩漏漏…

但…的確令我鬆了一口氣…

BB 名字…已經想好…仔女一樣諗好…

只是待塵埃落定…


仔女對於我…真係無咩所謂…

最重要係健健康康咁就得了…

十三週二日第一次照超聲波…老公陪我去…

胎兒已經7.4厘米…

睇到胎兒…睇到心跳…個種心情真係難以形容…

讓我回想起陀住小女個陣…想唔到轉眼已經十多年了…

一切真係要從頭學起…

比第一次做得更好…

照完照聲波要抽血檢驗…

抽左血驗…點知一星期不到就收到醫院電話通知…

我的血糖偏高…要回去飲糖水驗多次血…

我的心即刻一沉…

個一刻我唔係怕傳聞中的糖水…係怕我患上妊娠糖尿病…

嚇到即時上網睇…妊娠糖尿資料…

有時間再分享一下…


原先…見到好多朋友仔講政府係唔會安排照結構…

一早約好私家醫生二十週做結構…

點知…照左超聲波…姑娘就話出去約埋期回來做結構啦…

可能我高齡啦…

嘩…拿拿臨出去約啦…

預約十二月六日做結構…

唔講咁多…這一篇日誌…

我是要報喜…


相信睇到我日誌的朋友仔…一定會有好多個疑問…

不要多問了…只要說恭喜好了…

我個腦唔太想諗…想盡量保持愉快無憂的心情…

未來的日子…希望可以風平浪靜…

直至BB出世…




FACEBOOK 專頁 : https://www.facebook.com/mrmoon.renelee

聯絡我 ~ bbg1668@yahoo.com.hk


月兒部落分社 :


BEAUTY LIFE


BECB


THEXXXXX


BLOGSPOT


SHE


UBEAUTY


QOOZA


QOOZA BEAUTY


SINA


ELLE


COSMO


MYAGE


WESHARE


FANPIECE


SEEWIDE


MYBB


PIXNET

STYLE

INSTAGRAM ~ MRMOONMOON

純粹個人意見…請大家多多指教呢…

免責聲明 ~ 

本文發表的每一字一語內容全屬個人意見同感受…

不代表品牌的言論同立場…

如需獲得更多資訊同協助…煩請直接聯絡品牌查詢或尋求相關專業意見…

如從而引起的任何損失或法律糾紛…本人概不負責…


Comments