30th May, 2015
Edit

《史上最難問題:我哋夾唔夾啊?》

《史上最難問題:我哋夾唔夾啊?》

 

女人經常會問一個問題:「我哋夾唔夾啊?」

 

呢條問題可以話係史上最難答的問題頭十位,遠比宇宙點嚟更難,因為唔會有人隔一個月就問你宇宙點嚟,但夾唔夾就好似月經一樣,每當心情煩燥時就會聽到。

 

經過九九八十一次苦難後,我終於諗通咗,所以同大家分享下。

 

到底,係夾先一齊,定一齊先夾?

 

永遠都係後者,你無可能了解一個人,了解到佢去廁所嘅習慣、過節時嘅取態、甚至對結婚嘅期望。相處前,你對伴侶只係一知半解,或者你會覺得,大家都喜歡睇劇情片、亦喜歡行山、對政治有相同意見等等,但夾唔夾,唔係好似拼圖咁,一凹一凸,或者兩個平面相接,就算係拼圖,亦有四面,夾得一邊,可能唔夾另一邊。

 

孖生兄弟亦會有磨擦,更何況兩個世界嘅人?

 

小朋友好簡單,夾就一齊,唔夾就分開,長年累月相處下,無可能每一次都會夾,兩個企硬嘅人,唔會長久,等於一個密碼,你撞嘅次數夠多,總有機會撞開。嗰時會諗,呢個唔夾,咪搵個夾囉,試多幾次後,你會明白,呢個世界唔會有人同你完全夾。

 

分過幾次手得出嘅道理係,夾唔夾唔重要,互相了解,互相體諒、互相遷就,先會成就到一段感情,試下問十對老夫老妻佢地夾唔夾,佢地都唔會答你完全夾。

 

感情並不是交易,你買一部電話,佢會講清楚有咩設置,明買明賣,顧客永遠是對的,你比錢,佢會滿足你要求,You are the King,你可以盡情享受服務。

 

兩個人並非交易,而係一種修行,當中有苦、有樂;有甜、有酸;有笑、有淚。

 

修行之中,我們的菱角都被磨平,假以時日,終於成為一塊可以緊緊結合的拼圖。

 

好喇老婆,唔好再問我哋夾唔夾喇,依家一次過答你,唔係好夾咋,但會愈嚟愈夾。


Comments