16th April, 2015
Edit

《有日我女朋友問我,知唔知岳飛點死?》

《有日我女朋友問我,知唔知岳飛點死?》

有日我女朋友問我,知唔知岳飛點死?然後佢就講咗一個故事我聽。

今日我同大家講一個歷史故事,不過就發生係今時今日嘅香港,放心,唔係政治文,只係關於一個叫阿飛嘅可悲青年身上,而我就係阿飛。

宋朝抗金,今日我地都係抗金,抗金錢個金,作為塵世中迷途嘅小書僮,我服待嘅皇帝就只有一個,就係我女朋友,比個小貼士大家,揀女朋友,千其唔好揀個成個皇帝嘅,咩叫成個皇帝?簡單講,就係唔駛做,日日坐係皇宮中百無聊賴咁,佢每日只係煲劇上網,無辦法,鬼叫佢靚女、屋企又有錢,呢種含住金鎖匙出世嘅人唔會明白我呢種公屋仔,真係夠實力穩打穩扎對抗金錢嘅人點諗。

點解要抗金?只有一個微薄嘅願望,就係由塵世間迷途小書僮,升級做塵世間營役小樓奴,有樓,先有得結婚,這是常識吧。

我都算叻仔,憑一對手打拼,有份正職,得閒秘撈,有iPhone就用信用卡買,放咗賺錢之餘仲可以儲飛行里數,依家最Hit嘅匯豐紀念鈔我當然有抽,不過唔中囉。

眾所周知,岳飛都係一個叻仔,金人流傳有「撼山易,撼岳家軍難」的哀嘆,而比我放手去賺錢,我真係連自己都驚!可惜,皇帝都有種習慣,就係悶,悶要點?悶就要搵人陪,搵人陪,大佬,我打緊仗,都要抽空陪皇帝遊山玩水,仲要陪陪笑,之但係仗唔係唔駛打喎,佢唔會認為你陪咗佢就會少咗時間打仗,Why not Both?頂,講得出呢種說話嘅通常都唔係做嗰一個。

所以我同岳飛一樣,場仗本來可以再下一城,偏偏就變咗停滯不前。

不過我頂得順!

可惜,每個皇帝身邊都總會有小人,小人係咩?就係成日唔駛做,好似烏蠅咁嬲住皇帝嘅人,佢地永遠都會數住你嘅不是,因為佢地唔需要打仗,現代人稱之為狗公……不過我呢種人,現代都有個稱呼,高級兵,咪姐係將軍囉。

有人話,愛情就好似政治角力咁,有打三國誌嘅都知,將軍政治能力都偏低,所以咁咪出事囉……

事情係咁嘅,有一日我博緊命個陣,收到女朋友Msg:「老公豬,我好悶悶啊!」而我趕緊份Project,心諗,你悶咪搵野做囉……我份人都好悶,你自己搞掂自己先啦!

做完野嗰陣我都知出事,因為佢連續Send咗12個Msg比我,所以我仆去佢屋企搵佢,佢竟然同我講分手!!

轟轟轟轟轟轟轟轟轟轟轟轟轟轟轟轟,晴天霹靂。

「點解?」
「你無回我Msg!」
「我打緊仗嘛,點覆你Msg姐?你又唔係有咩重要事……」
「我唔理,我估唔到我Send咗十二個Msg比你你都唔覆,你唔愛我喇……」
「喂,好小事姐,唔駛玩分手嘛……下次最多我覆你機啦!」
「已經唔係覆唔覆我嘅問題喇!」
「咁……咁係咩問題呢?」
「我覺得你好無安全感。」
「咩係安全感?」
「我唔知啊,總之你無囉。」

就係咁,我就被飛了。

諗起岳飛當年點死,我終於明白自己衰係邊。明顯今次唔知邊個狗公又係佢面前推波助瀾,數我唔陪佢唔覆佢,而佢又真係信喎……當年處死岳飛嘅叫「莫須有」,其實同今日嘅「安全感」咪一鳩樣,都係你解釋唔到解決唔到嘅事,一句「我唔知啊!」加埋「你無安全感!」其實可以應用係任何分手場合,認真係世界級。

而導火線,同岳飛一樣,佢接咗十二面金牌都唔回朝,今日有個Terms,叫「已讀不回」。

呢個故事教訓你,千其唔好「已讀不回」,岳飛就係咁死。

師傅,明白了。

完。


Comments