11th April, 2015
Edit

《情侶測試計劃》

《情侶測試計劃》

 

我叫阿力,最近我發現女朋友行蹤非常可疑,有時收工話攰要返屋企,然後幾個鐘都消失,而且她唔會俾我Check佢電話,每次我掂吓咋,佢也會嬲豬搶返部電話。

 

有合理條件地……我懷疑佢對我不忠。

 

然後我就搵到呢間公司,前幾日我睇雜誌見到廣告,正正係雜誌封底,幾隻大字吸引著我:「要測試你的伴侶是否忠誠嗎?只需188元!」

 

經過幾次查詢後我約見呢間公司,估唔到呢間寂寂無名的公司竟然能在甲級寫字樓高層擁有一整層的寫字樓。門口兩個接待員都是女神級,剛進門口兩個女神一起跟我打招呼,然後其中有一個胸部比較大的帶了我到某個會客室中等候。

 

其實我覺得好唔對路,呢個188的套餐,一天需要做幾多劑先俾得起租金?這種落差讓我有種黑店的感覺……

 

會客室的門一分鐘後就被推開,一個貌似……貌似占Sir的光頭佬走了進來,臉上的笑容像是打他幾拳也能保持的樣子。

 

「陳生!歡迎歡迎,多謝你選擇敝公司的服務,我叫阿占,阿笨與阿占裡面的阿占,哈哈哈,好易記吧,今天,由我阿占服務你,保證由頭爽到落尾,係呢,唔知陳生你點稱呼呢?」我懷疑佢係特登扮占Sir,仲走埋去整容整埋占Sir個樣,口吻十足十,但呢種口吻令我覺得伏味大增。

 

「我……我姓陳,叫我陳生得喇。」我勉強地回答:「係呢……呢度,係唔係有測試伴侶服務?我指188元的那個套餐……」

 

「有!當然有,188全包,連加一服務費都無。Surprise!!!」占Sir爽快回答。

 

「咁咁咁其實包咩?」廣告上的資料不多,這也是我覺得不安的原因之一。

 

「包測試到,眾所鳩知,現代人出軌簡單到一個程度你知唔知係咩啊?就好似你收到 Cold Call電話咁,一日幾個咁,好多人,特別係班無知婦孺一個把持唔住,咁就落搭,我哋公司包括部份最全面,TxxDER, WXXXAT, LXXX, WHXXXXP, FX, 基本上所有有機會出軌嘅渠道都會同你測試,阿陳生,你只需要提供你女朋友名字、電話、電郵,基本上敝公司已經可以將所有資料搜集,咦,陳生你呢個眼神……我知你諗緊咩,哈哈,你諗緊合唔合法啊嘛……放心!我哋大公司唔會做犯法野,即使要冒上犯法嘅風險,亦唔會被人拉,就算拉到都告唔入!而且我地採用全真人測試,保證真實,帳號完全睇唔出係假,包保對方會相信。係唔係對敝公司充滿信心呢!」占Sir講到眉飛色舞,唔講我以為佢做緊幾千萬嘅生意。

 

我豁出去問:「其實……貴公司憑咩去維持營運呢?188,你一日要做幾多個客先可以賺到錢,之後嘅人力物力我都未諗,坦白講我真係有少少疑惑。」

 

占Sir就像預計到我會問一樣:「陳生,關於你的問題,我很樂意去解答,但不如你先簽好這份188元的計劃授權書先,我哋一樣一樣嚟!放心,裡面無鬼崇野,我地唔做呢樣,阿占點會搵你笨先得嫁!」

 

我將份授權書由頭睇到尾,重覆咗三次之後發現真係無問題,我就簽好名。

 

阿占呼咗一口氣,然後話:「好,陳生,頭先你已經留意到你參加計劃就會自動成為敝公司紅寶石級至尊會員係嘛,咁我可以同你介紹紅寶石級至尊會員嘅服務範籌喇!」

 

佢拎左部iPad出黎,然後Airplay咗去個六十吋嘅Projector度,裡面有唔同形式嘅相片例子,不外乎係測試之下失敗嘅例子,男女朋友分手嘅情況。

 

「陳生,頭先我都有講過,出軌,就好似Cold call一樣,每日都有幾個,但講唔埋有一日,你都會收到Cold call,一個大美女投懷送抱,咁陳生,你相信自己把持得住嗎?」

 

我搖頭,肯定咁講:「我唔會對女朋友唔住!」

 

阿占將幾張新相拉出問:「如果係呢幾個女仔呢?」望住幾個Model級嘅女仔,我忍唔住吞咗啖口水:「我…我唔會……」

 

「嗱嗱嗱嗱嗱嗱嗱嗱,你窒左一下,你猶豫,你恐懼,你誤判!我都係男人,我都明白呢種情況,你依家答咩都死,真係面對個陣,你唔知細佬會唔會充左血,你知啦,細佬充血,大腦就唔夠血,大腦唔夠血,你就諗唔到野,諗唔到野,你就會中招!嗱嗱嗱,如果條女係真嘅,當然恭喜你啦,之不過……如果條女係敝公司嘅刺客,咁你話點算好,我可以話你知,有90%以上嘅人都會中招,到時條女飛咗你,而你媾嘅新女又係假,咁真係渣都無!不過!好彩你今日成為咗我地紅寶石級至尊會員,所以可以享受到我地反測試保障,如果你女朋友搵我哋試你,我地會立即通知你,而且更會度身訂造一個令你女朋友信任你一百倍嘅故事,令你地更恩愛,更幸福!而阿陳生你出去玩,都可以玩得開心,出得放心啦!」

 

聽到呢個驚天地泣鬼神嘅保障計劃,我出唔到聲,應該話,我唔識去講野。

 

「陳生你應該係價錢方面有Concern啦,其實我地依家做緊推廣,每月只需要2888,我地就會為你提供全面保障,優惠期內我地更會送出無限次測試伴侶計劃!到時你嘅小三小四小五小六中一中二中三有咩風吹草動,對陳生你不忠,你立即就可以知道!」阿占努力地說服我,而我終於明白,呢間公司因為咩可以生存到,就係呢種增值服務。

 

「講真,我從來無諗過自己女朋友唔住,今次上嚟只係因為女朋友最近有奇怪,我有少少不安,我亦坦白講,為防我亂洗錢,我今日只係帶咗200蚊現金,仲有張無自動增值嘅個人八達通,所以你點迫我迫Sell我都無用,如果我五點無返屋企,我屋企人就會幫我報警,不如你死咗條心佢啦。」好彩我早有準備,唔係今日真係門口都出唔到。

 

阿占聽到之後仍然保持住笑容,不慍不火咁講:「阿陳生,你太唔夠朋友喇,估唔到你係咁睇阿占我!我話比你聽,我絕對唔係追Target,亦唔需要你幫幫手,作為一個Top Sale,我從來都唔會迫個客,如果你有需要,你絕對會買;如果你無需要,我又點會迫你呢!如果陳生你對呢個增值服務無興趣嘅,我亦可以即刻收聲,如果陳生你趕時間返屋企嘅,我可以幫你Call的士添,你知啦,我都唔想有警察上門搵失蹤人士嘛!哈哈哈。」

 

就係咁,我離開咗呢間公司。

 

 

「葉小姐,多謝你選用敝公司嘅測試保障計劃,而我依家通知妳,妳男朋友係今日下午三時二十三分正式授權敝公司對閣下進行測試,未知妳有無指定要求,我哋亦可以建議回答方式令妳男朋友信任。」阿占熟悉嘅聲音再次響起。

 

電話另一面嘅葉小姐好冷靜講:「幫我由正常程序處理就得。係呢,之前叫你幫我測試嘅人結果如何?」

 

「哦,我哋對戴先生進行咗十二次測試,全部都失敗,其實戴生有參加到我哋藍寶石級保障計劃,好彩葉小姐你係我地金鑽級會員,級別之下當然無視啦。」阿占興奮地講。

 

葉小姐收線之後心諗:「都估到佢,等佢平時仲扮晒野做乖乖仔,都話男人放到嘴邊無可能唔食啦,哼,呢個金鑽級會員都算值,起碼比我試到呢個衰男人,都係快快手襯佢出去玩有內疚感叫佢買個Hermes手袋比我先。」


Comments