10th March, 2015
Edit

《求婚這場大龍鳳》

《求婚這場大龍鳳》

 

求婚兩字,你會想起什麼?燭光晚餐在香檳杯看到戒指?在時代廣告屏幕下九十九個途人獻上鮮花?走在街頭一群人載歌載舞然後拉出Will You橫額?女性對求婚都有種Fancy的感覺。

 

曾經看過專欄提到,求婚?求乜鬼?根本大家有所共識,根本正正常常無Say No可能。我認同,求,在現今社會只是做場大龍鳳,大龍鳳不是錯,因為女人一定Buy,而男人做左亦煩少好多。

 

我曾幻想過自己會如何求婚,無數次。

 

可是……我從沒想過是咁的……

 

那晚,我同我未婚妻分手,咪住,你唔係話求婚咩?點解跳左去分手?你無睇錯,係分手,分手原因不詳述,坦白講,我同佢一齊日子唔長,唔……當日應該一個月都未到,但唔知點解,同佢一齊既頭幾日我已經有種會同呢個女人結婚嘅感覺。

 

戒指我買左,求婚呢場大龍鳳,我都諗過度過,正在準備中,但我無諗過,呢場大龍鳳爛尾收場……

 

分手之後,我大叫,我唔再愛你喇!然後我見對面有的士就上車走,係車窗中,我見到佢蹲係地下喊,係車上我不斷諗,要唔要返去要唔要返去,突然我電話響起,係佢,佢叫我返去搵佢。

 

我諗都無諗就同的士佬講,返轉頭,仲好記得佢問我:「咦,漏左野啊?」係原地落車我已經見唔到佢,當時零晨五點幾,唔知點解有個男仔係度食煙,佢同我講左句:「佢入左裡面啊。」「唔該……」然後我見到佢。

 

唔知你信唔信呢個世界有天使?

 

原來當我未婚妻喊左陣,佢已經見唔到我,然後佢見到個男仔,佢問:「你有冇見到頭先同我一齊嗰個男仔啊?」「哦……佢上咗的士走咗喇……不過,佢走之前有望過你一眼嘅。」

 

就因為呢個來歷不明嘅男仔,佢好多事,好戲劇性嘅一句,所以我未婚妻打返比我。

 

嗰一刻,我突然覺得,無一個時刻比呢一刻更值得去求婚,所以我跪左係佢面前,捉住佢對手。

 

我話。

 

「呢一刻,我無戒指,我無鮮花,我無燭光晚餐,應該話,我乜都無準備到……唔係,應該話,我準備緊。

 

但係……我用呢一個月發生嘅事,呢一個月裡面我地嘅喜與悲,我地經歷過嘅一切一切。有人話,求婚鑽戒應該用三個月人工去衡量,但再多都有價,鑽戒表示到誠意,不過鑽戒本身唔代表咩。

 

你……願唔願意嫁比我啊?」

 

如果我要形容人生入面最型嘅一刻,我會毫不猶豫揀呢一刻。

 

諗清楚,點解要同你結婚,永遠都唔係因為一場大龍鳳,一粒大鑽石,佢句「Yes!」永遠都來自你倆的記憶,你倆的一切。

 

現代人在形式上愈來愈注重,不論婚禮定求婚,都希望有多獨特咁獨特,有幾難忘咁難忘,不過唔好忘記,婚禮又好,求婚又好,最獨特係你地兩個,天下無第二對你地。

 

記得一句,重形式還重形式,不過,勿忘初衷。

 

Btw,佢Say No。哈哈。

 

不過最後點?有機會再講。


Comments