28th February, 2015
Edit

《婚禮上的,是禮金,還是帛金?》

《婚禮上的,是禮金,還是帛金?》

 

愛情,並非年輕人專利,卻由年輕人專美。睇睇電影電視便知道,唔好講老年,想搵條中年的感情線都一隻手數得晒。

 

白頭到老,其實同童話故事入面嘅「從此以後……王子同公主就過住幸福快樂嘅生活喇。完!」

 

完?係啊,就咁完左。

 

有邊個會想像過幸福快樂嘅生活係點?又有冇人會思考白頭到老四個字,當中涉及幾十年發生嘅事會有咩?

 

愛情無教學,但睇得多小說電影,扮下浪漫去演繹「愛情」,我地都算駕輕就熟,但如果愛情無教學,白頭到老又有教學嗎?無,感覺上,結婚生仔之後,我地除左等死外,前行漫無邊際。

 

同個結左婚嘅朋友傾結婚。

 

「結左婚之後你點啊?」

「都係咁啦。」

「姐係點啊?」

「平平淡淡咁囉。」

「咁咪……好無聊囉。」

「愛情變成感情,好正常,結婚你仲想有激情咩?」

 

有冇諗過,每三對夫婦,就有一對會離婚,另外有一對係想離懶得離,仲有一對係無期望,亦無失望。

 

幾多對持續愛到幾多歲?

 

當你接受婚姻應該平淡,同時你亦要接受現實中有為數極多失敗婚姻,望望四周,數三對人,唔係佢地?可能係你。

 

平淡論,我從來唔Buy,平淡論只係你有一個合理藉口去解釋你擁有一段麻麻地嘅婚姻,問下自己,有幾愛對方,如果真係咁愛,你唔會用平淡去形容呢段關係。

 

愛情,係一條減數,開始總係最美好,當愛情減退變感情,當感情磨蝕成無情,就係結束之時。

 

如果你發現係一條加數,恭喜你,呢段唔係愛情,而係婚姻,你地可以愈走愈遠。

 

可惜依家太多人,以一條減數放落加數去計,計唔掂數個陣就講句:「係咁嫁啦,好出奇啊!」其實真係好難聽。

 

市面上極多關於愛情嘅書,但我認為,我地更需要關於婚姻嘅書,因為一段愛情,可能係三五七年,而婚姻,可以係三五七十年。

 

好多人話,婚姻係墳墓,如果你認同,你唔會去經營,你唔會去選擇,你唔會去努力,你唔會去關心,所以,求仁得仁,其實結婚,收嘅係禮金,定帛金,係自己選擇。

 

唔好信一班婚姻生活「平淡」嘅人講野,跟錯師傅,師傅咩樣,你咪咩樣囉。


Comments