3rd November, 2013
Edit

小圈子

一群女性聚在一起時產生的其中一個問題,就是小圈子。

 

本來一群人裡沒有所謂這個圈子那個圈子,往往是因為些雞毛蒜皮的事,比方說,某日有人挽了個名牌手袋回公司,幾個人聚在茶水間或是洗手間,妒嫉心發作忍不住七嘴八舌談論起來:喂,你話Jessica個手袋邊個送架啦?

 

佢人工咁甭,邊有錢買?

 

你唔比人碌卡既?話唔埋人地有個有錢男朋友呢。

 

可能係假既都唔到喎,我個friend係米蘭站做,佢話呀,呢個係限量版黎,訂都未必有。

 

幾輪下來,細聲講大聲笑,Jessica就成了文革裡那個插著牛鬼蛇神木牌的批鬥對象、被打成了虛榮、扮嘢、貪錢等等不一的罪名,然後遠遠的見到Jessica走過來,一群人雞飛狗走,驚死人唔知佢地講緊人壞話咁。

 

好衰唔衰,這群人還要在Jessica面前裝得多麼有善,這頭才在說哎呀你個袋真係靚架姐,那邊廂晚上放工就在電話裡公審:你睇佢個樣,幾得戚呀。

 

啲人真係唔知醜,用假野都咁招積。

 

咪係囉,以為自己係邊個呀,咪又係靠痴男人。記唔記得呀,上次呀,嘩佢對住個PM,發曬姣咁,都唔知博乜呀啲人。

 

在WhatsApp開個group,這個在她Facebook挖黑材料,那個去她相熟的同事裡攞口風,然後各種抹黑唱衰統統出來了。一群人就這樣因為些雞毛蒜皮的事,把一個無辜的人批鬥成敵人壞蛋來取樂,小圈子就這樣形成了。

 

堂前燕博客:www.facebook.com/r1r.patpat


Comments